PHRMDO Chief Bermejo: P503.00 na ang sweldo sa Comval SPES karon

Compostela Valley Province—Subling gipadak-an ni Gov. Jayvee Tyron Uy ang sweldo sa mga estudyanteng Comvaleño nga gipatrabaho sa gobyerno panahon sa Summer ilalom sa gipakusog niyang “Special Program for Employment of Students (SPES)”, ug gisulti mismo ni PESO Manager PHRMDO Chief Lara Zaphire Kristy N. Bermejo nga miabot na karon sa P503.00  matag adlaw ang sweldo nga madawat sa mga SPES Babies sa Comval gikan P453.00 lang matag adlaw sa milabayng 2018.

Si Bermejo maoy mihatag sa Welcome Message atol sa usa ka adlawng “SPES Orientation” diha sa Capitol Lobby niadtong Abril 8,2019 nga giapilan sa 208 Comval SPES kon kinatibuk-ang ihap sa mga estudyanteng Comvaleño nga gipatrabaho ni Gov. Tyron Uy panahon sa Summer para sa tuig 2019.

Panahon sa iyang mensahe opisyal niyang gipaabot ang iyang awhag sa mga SPES Babies nga kon pwede ilang ipadayon ang maayong gawi ug pamatasan sa panarbaho nga ilang ginahimo gikan sa pagsugod labi na ang pag-abot sa opisina nga on time nga usa sa mga best attitude sa usa ka maayong empleyado, ug swerte sila matud pa niya tungod mas dako na ang sweldo nga ilang madawat nga karon moabot og P503.00 matag adlaw.

Samtang, parte sa kalihokan ang Inspiring Message ni Gov. Tyron Uy nga gipabati ni Assistant Provincial Administrator Placido Alcomendras Jr.. Apan ang Orientation Proper gidumala nila Senior Labor and Employment Officer (LEO) Dinalynn I. Basco ug LEO-III Dorothy C. Muring sa DOLE Regional Office XI nga maoy nag-facilitate sa ilang Signing of Contract, sa ilang Meeting, ug sa Election of Officers per Municipality sa Comval SPES. (Gilbert M. Cabahug PAO-ID Comval)