Comval Young Farmers ang Regional Over-All Champion sa bag-o nahumang “Regional 4H Youth Camp”

Compostela Valley Province—-Ang Comval Young Farmers maoy gideklara sa mga dagkong opisyal sa Agricultural Training Institute Regional Office (ATI) XI nga Regional Over-All Champion atol sa bag-o nahumang “Regional 4H Youth Camp”.

Ilalom sa temang “BIDA 4H: Bringing Innovations and Development in Agriculture through 4H Club”, ang dakong panagtapok sa 4H Federation Officers ug piniling mga 4H Members gikan sa nagkalain-laing probinsiya, mga siyudad, ug kalungsuran sa Davao Region nahitabo diha sa GSP Alano, Regional Training Center, Daliao, Toril District sa Davao City niadtong Abril 4-6, 2019.

Panahon sa tulo ka adlawng panagtapok sa mga Young Farmers gikan sa nagkadaiyang dapit dinhi sa Rehiyon 11 napasundayag pinaagi sa gihimong contest kon indigay ang nagkadaiyang Agricultural Skills diin maoy naghawod ang mga taga Monkayo nga sila Camille Jane Campilan-1st Prize Winner sa Cooking Contest Cacao Based, Rodel Artiaga-1st Prize Winner sa Video Making  Contest, ug Corrine Imba-1st Prize Winner sa “Himig Handog Singing Contest”.

Apil sad sa taga Comval nga mananaog sila Irene Jane Ladera sa Maco-1st Prize Winner sa Terrarium Glass Gardening; si Judiel Cabilan sa Compostela-2nd Prize Winner sa On the Spot Canvass Painting Contest; ug Consolation Prize Winners nga sila Rocelle Caguyong sa On The Spot Spoken Poetry-taga Mawab ug Lovely Manguray sa 4H Quizz Bee-taga Mabini nga gihatagan sa ilang Awards ug mga sertipiko sa mga dagkong opisyal sa DA-ATI XI nga sila Region XI 4H Coordinator Hannah Ruth Liong ug mga kauban nga sila Lucille Bocado, Assel Madanguit, Lourdez Encarnacion, ug Guila Rose Rubis.

Niadtong Abril 15,2019 malipayong gitunol mismo ni kanhi 4H National Winner Provincial Administrator Virgilia S. Allones ug mga kauban nga sila 4H Provincial Coordinator Nelma Aranton ug PAGRO Chief Dr. Minda Agarano ang ilang Awards panahon sa Awarding Reenactment atubangan sa hapit 500 ka mga empleyado sa probinsiya nga mitambong sa Employees Regular Convocation Program.

Usa sa mga importanteng programa sa panguma nga gipakusog ni Gov. Jayvee Tyron Uy sa Comval ang pagpalambo sa katakos sa mga batan-ong Comvaleño sa teknolohiya sa panguma pinaagi sa padayong paghatag kanila sa libreng Trainings uban ang dakong tabang sa ATI-XI nga maoy constant partner sa probinsiya niining programaha. (Gilbert M. Cabahug, PAO-ID Comval)