Drug Offenders nga nakabenepisyo sa “Plea Bargaining” ipailalom sa  Expanded Oplan Liwanag

Compostela Valley Province–-Plano karon sa probinsiya nga mas palapdan ang serbisyo nga mahatag sa gobyerno ngadto sa mga  drug offenders pinaagi sa pagmugna sa “Expanded Version” sa “Oplan Liwanag: Community Based Trans-formative Intervention Program for Voluntary Surrenderers for Reform” nga gidumala sa “Provincial Anti-Drug Abuse Council (PADAC)” nga gimugna ni Gov. Tyron Uy ilalom sa Executive Order (EO) No. 064-2016 nga iyang gipagula niadtong Agusto 2, 2016.

Panahon sa Coordination Meeting nga gipanguluhan ni PADAC Action Officer Mario Angelo Sotto diha sa CCMPC Function Hall sa kapitolyo niadtong Pebrero 14, 2019, nasabotan ang pagmugna sa Expanded Oplan Liwanag aron mahatagan sad sa susamang pag-atiman  kadtong mga Drug Offenders nga nakabenepisyo sa Plea Bargaining Program sa Supreme Court.

Mitambong sa Meeting sila si PADAC Secretariat Head Assistant Provincial Health Officer Dr. Mary Cyrell G. Pasaol, Atty. Joanna Sablon sa Public Attorney’s Office (PAO), Agent Hazel Mandanao sa PDEA, Provincial Fiscal Atty. Lina Lou Veloso, Nenita Pongcol sa PSWDO, ug pipila sa mga dagkong opisyal sa mga kapulisan ug kasundalohan.

Ang pagpahigayon og Plea Bargaining sa mga akusado gitugot sa Supreme Court para niadtong mga nakasuhan tungod sa ginadiling druga, ug matud ni Judge Cresenciana D.C. Cruz sa Regional Trial Court (RTC) Branch-3 sa Nabunturan nga sa Comval Province adunay ubay-ubayng gidaghanon sa mga nakasuhan tungod sa violation sa illegal drugs nga karon nakabenepisyo sa Plea Bargaining sa gobyerno.

Kini sila dili puwede matud pa  niya nga isagol sa mga Voluntary Sureenderers for Reform (VSR) tungod mas grabe ang ilang pagkagumon sa ginadiling druga, ug duna sad silay kaso nga nadesisyonan na sa korte for a lesser offense human sa Plea Bargaining diin usa sa mga requirements kanila sa gobyerno ang pagpailalom sa Drug Rehabilitation aron sila maandam pagbalik diha sa community. (Gilbert M. Cabahug, PAO-ID Comval)