Comval kaduha gihatagan sa “Green Banner Award” tungod sa ubos kaayong “Malnutrition Prevalence Rate”

Compostela Valley Province–-Tungod pinakaubos ang Malnutrition Prevalence Rate sa tibuok Davao Region, gihatagan gihapon sa Department of Health (DOH) pinaagi sa National Nutrition Council XI ang Comval Province sa “2017 Green Banner Award- Provincial Level Category”, nga malipayong gidawat nila ni Gov. Jayvee Tyron Uy ug Vice Gov. Manuel “Way Kurat” Zamora” gikan ni PHO Chief Dr. Antonio Ybiernas Jr. atol sa “Awarding Re-Enactment” diha sa kapitolyo niadtong Enero 7,2019.

Sa milabayng 2016 ang Comval Province mitala sa 3.6% Malnutrition Prevalence Rate nga giilang pinakaubos sa tibuok Region XI rason sa “2016 Green Banner Award” nga gihatag kang Gov. Tyron Uy sa “Department of Health (DOH)” pinaagi ni Regional Nutrition Program Coordinator Dr. Ma. Teresa L. Ungson sa “National Nutrition Council XI”.

Samtang sa 2017 ang tibuok Comval Province mitala sa 2.9% Malnutrition Prevalence Rate, ug tungod pinakaubos gihapon sa tibuok  Davao Region rason sa “2017 Green Banner Award” nga gihatag sa Comval ni Nutrition Program Region XI Coordinator Ungson atol sa Awarding Ceremony nga malampusong gihimo diha sa Grand Regal Hotel sa Dvao City sa milabayng Nobyembre 2018.

Una nang gipahibalo ni Gov. Tyron Uy atol sa iyang “2nd State of the Province Address” ang kusog nga pag-ubos sa Malnutrition Prevalence Rate sa Comval Province gikan 3.6% sa 2016 ngadto sa 2.9% nalang sa 2017 nga maoy resulta sa nagkadaiyang Best Practices nga iyang gipatuman human siya milingkod nga gobernador sa Comval Province.

Apan luyo sa ubos kaayong malnutrition prevalence rate giklaro sa gobernador nga padayon gihapong maningkamot ang probinsiya nga mabuhat ang pinakamaayong programa sa Nutrition hangtud nga makab-ot ang “Zero Malnutrition Prevalence Rate” sa tibuok Probinsiya.

“We will not stop until we rescue the last child from the bondage of hunger, poverty, and under nutrition.” Matud ni Gov. Tyron Uy (Gilbert M. Cabahug, IDS-Comval, Photo by Albert Dayao)