Sa Comval: 1,853 ka mga estudyante nag apil sa CVSP Written Exam

Compostela Valley Province—-Miabot karon sa 1,853 ang gidaghanon sa mga estudyante nga nag-apil bag-o lang sa “Written Exam” sa Compostela Valley Scholarship Program (CVSP) diin pinakadaghan ang mga taga Compostela nga miabot og 264 ka mga estudyante, ug nagsunod ang mga taga Laak ug taga Maco nga ang kada lungsod dunay 216 ka mga estudyanteng miapil sa examinasyon.

Ang ilang Wriiten Exam segon sa report sa Opisina ni Youth Development Division Chief Janice Clarion, gisugdan paghatag sa probinsiya niadtong Oktobre 9, 2018 diha sa Mabini National High School ug sa AOSR National High School sa Maco sugod sa alas 8:00 sa buntag. Samtang, sa ala-1:00 sa hapon ang Written Exam diha himoon pagdungan sa Pantukan NHS ug sa Magnaga NHS.

Matud ni  Janice Clarion nga tungod naaprobahan na sa Comval SP sa pagpanguna nila ni Vice Gov. Manuel “Way kurat” Zamora ug Senior Board Member Arturo “Chiongkee” Uy ang proposal nga giduso ni Gov. Jayvee Tyron Uy para sa School Year 2018-2019 mas malipay gyod ang mamahimong Scholar ubos sa CVSP  tungod mas dako na gyod ang benepisyo nga ihatag kanila sa probinsiya.

Gisulti sad niya nga ubos sa bag-ong CVSP nga naaprobahan sa Comval SP bag-o lang gipatas-an ang benepisyo sa mga Scholars sa probinsiya sugod sa  School Year (SY) 2018-2019 nga diin mamahimo nang  P15,000.00 matag semester ang para sa TVET ug Baccalaureate Regular Courses para niadtong mag-eskwela sa mga pribadong eskwelahan, ug P10,000.00 matag semester nga allowance ang ihatag sa probinsiya para niadtong diha magtungha sa State Colleges and Unversities nga karon libre na ilalom sa RA 10931.

Samtang, P25,000.00 matag semester ang para sa Baccalaureate Prioritized Courses nga diha magtungha sa mga pribadong Eskwelahan ug P20,000.00 Stipend ang ihatag sad sa probinsiya sa mga estudyante nga diha mag-eskwela sa State Colleges and Universities nga libre ilalom sa RA10931. (Gilbert M. Cabahug, IDS-Comval)