P200 Milyones igahin sa 2019 aron Zero Billing tanang kabus nga mga pasyente sa CVPH

Compostela Valley Province— Aron Zero Billing ang tanang kabus nga mga pasyente sa Comval Provincial Hospitals moabot gyod sa P200 Milyones ang igahin ni Gov. Jayvee Tyron Uy para sa tuig 2019, ug giklaro sa gobernador sa iyang pagsulti niini nga sa ikaduhang tuig sa iyang administrasyon naa na sa 92% kon 920 kada 1,000 ang gidaghanon sa mga pasyente nga nakanenepisyo sa Zero Balance Billing Policy labaw sa DOH Target nga 70% lang.

Gipasabot sa gobernador ang dakong tinguha sa probinsiya nga malibre sa hospital services ang tanang kabus nga mga pasyente sa CVPH rason sa P200 Milyones pundo nga iyang igahin para sa tuig 2019 lang aron way mabayrang hospital bills ang tanang kabus nga mga pasyente nga magpatambal diha sa CVPH Montevista, CVPH Pantukan, CVPH Maragusan, ug CVPH Laak.

Una niini gipahibalo sa gobernador panahon sa iyang “2nd State of the Province Address (SOPA)”ang kapin 21,000 gidaghanon sa mga pasyente sa Comval Provincial Hospitals gikan Hulyo 2017 hangtud Hunyo 2018 lang nga wala gipabayad sa ilang Hospital Bills sa rason nga sila kabus ug lisud ang kahimtang sa ilang pamuyo, ug miabot gyod matud pa niya sa kapin P119 Milyones pesos nagastong pundo sa probinsiya para sa Hospital Services nga gihatag kanila nga libre kon walay bayad.

Samtang, gipasalamatan sad ni Gov. Tyron Uy ang Comval SP sa pagpanguna nila ni Vice Gov. Manuel “Way Kurat” Zamora ug Senior Board Member Arturo “Chiongkee” Uy nga sa kanunay naga-complement sa iyang mga programa ug proyekto pinaagi sa daling pag-aproba sa giduso niyang Budget labi nasa P4.5 Milyones pundo gikan sa Disaster Fund nga iyang gigahin aron itabang sa mga biktima ni Ompong.(Gilbert M. Cabahug, PAO-ID Comval)