Gov. Tyron Uy gisugdan ang Province-wide Implementation sa iyang “Oplan Pagbabago Program”

Compostela Valley Province— Gisugdan na karon sa probinsiya ang Provincewide Implementation sa “Oplan Pagbabago Program”  nga gipatuman ni Gov. Jayvee Tyron Uy ilalom sa Executive Order (EO) No.028-2018 nga iyang gipagula niadtong Agusto 17,2018.

Gitumong sa Oplan Pagbabago nga mahatagan og talagsaong klase sa pag-atiman kadtong mga Former Rebels sa Comval Province kon kanhi mga sakop sa Rebeldeng NPA kauban ang ilang Mass-Based Sympathizers  nga nag-surrender kon mibalik na sa sabakan sa gobyerno sa rason nga gusto na nilang magpuyong malinawon kauban ang ilang tagsa-tagsa ka pamilya, nga sa pinakaulahing ihap miabot na sa kapin kon kulang 7,000 ang ilang gidaghanon sa Comval Province.

Kining Programaha segon sa gipagulang E.O. dumalahon sa OPlan Pagbabago Action Team nga gipanguluhan mismo ni Gov. Tyron Uy nga maoy Chairperson ug mga kauban nga sila PA Virgilia S. Allones-Vice Chairperson, ug Action Officer nga mao si PSWDO Chief Josephine Frasco.

Unang hunat sa Provincewide Implementation nahitabo diha sa Brgy. Araibo, Pantukan niadtong Septyembre 26,2018 ug human niini ang sa Monkayo nga gisugdan sa Municipal Launching diha sa Brgy. Rizal niadtong Septyembre 28,2018.

Una niini ang “OPlan Pagbabago Provincial Launching” diha sa kapitolyo niadtong Agusto 24,2018 nga gipanguluhan ni RPOC Chair Gov. Tyron ug mga kauban nga sila   BGen Reuben S Basiao sa 701st ID, Col. Gilbert F Saret sa 1001st Brigade ug Undersecretary Nelson Estares nga maoy mihatag sa mensahe ni  “Special Assistant to the President “SAP” Christopher “Bong” Go.(Gilbert M. Cabahug, PAO-ID Comval)