Comval gihatagan sa PCSO og usa ka ambulansya

Compostela Valley Province-Gipaabot mismo ni Gov. Jayvee Tyron Uy ang iyang mainitong pasalamat sa mga kadagkoan sa Philippine Charity Sweepstakes (PCSO) nga nagdonar sa Comval ug usa ka ambulansya, nga gitunol mismo sa mga kadagkoan sa PCSO sa pagpanguna sa ilang General Manager nga si Alexander Balutan.

Ang Turn-Over Ceremony nahitabo diha sa kapitolyo niadtong Oktobre 1, 2018 atol sa Employees Regular Convocation Program diin parte sa kalihokan ang opisyal nga pagtunol sa usa ka bag-o ug nindot nga ambulansya nga gihatud sa Comval sa mga kadagkoan sa PCSO nga mipirma kauban ni Gov. Tyron Uy sa Deed of Donation pabor sa PLGU Comval.

Sa milabayng 2016 miabot sad sa probinsiya ang usa ka “P25 Milyones CT Scan” nga gihatag gihapon sa PCSO aron mas mahatag pa sa Comval Provincial Hospital ang pinakaamaayong serbisyo sa panglawas ngadto sa mga katawhan.

“Dako akong pasalamat sa PCSO sa paghatag kanato’g ambulansya nga makatabang sa atong pagresponde sa mga kaigsoonan natong nagkinahanglan. Daghang salamat kay General Manager Alexander Balutan ug sa iyahang saad na lain pang tulo ka ambulansya alang sa upat nato ka provincial hospitals,” matud ni Gov. Tyron Uy. (Gilbert Cabahug // ID Comval)