Gov. Tyron Uy gitabang sa Rice Farmers ang P12M premyo sa “ National Rice Achievers Awards” sa Comval

Compostela Valley Province – Gigamit karon ni Gov. Jayvee Tyron Uy aron pagtabang sa mga Rice Farmer Cooperatives ang P12 Milyones Cash Prize sa tulo ka mga “National Rice Achievers Awards” nga nadawat sa Comval Province gikan sa Malacañang pinaagi sa Department of Agriculture (DA), ug duha na gyod ka mga Rice Farmer Cooperatives ang nanakabenepisyo sa walay interest nga pahulam sa probinsiya gamit ang maong pundo.

Si Rice Program Coordinator Mary Jane Jaom sa Comval PAGRO nagsulti nga unang nahatagan sa walay interest nga pahulam para sa mga Rice Farmer Cooperatives nga gipakusog sa Comval ni Gov. Tyron Uy ug SP Members sa pagpnguna nila ni Vice Gov. Manuel “Way Kurat” Zamora ug Senior Board Member Arturo “Chiongkee” Uy ang Libasan Primary Multi-Purpose Cooperative  nga nakadawat sa ilang P1 Million nga tseke gikan sa Gobernador niadtong Abril 2018.

Duha matud pa ka tuig ang ilang pagbayad niini ug walay labot sa ihap ang 6 ka bulang grace period nga gihatag kanila sa probinsiya aron mapaneguro nga makatabang kanila ang kwarta nga ilang gihulaman.

Ikaduhang recipient ang Compostela Valley Irrigators Producers Cooperative(CVIPCO) nga nakadawat niadtong Lunes(Septyembre 3,2018) sa P1.5 Milyones gikan sa probinsiya ug laing P2 Milyones Cash Grant nga gihatag kanila sa DA Regional Office XI.

Tungod sa mga maayong nahimo aron modaghan ug modako ang ani  sa tibuok probinsiya kada tuig pinaagi  sa lain-laing Agricultural Interventions nga gitunol   ngadto sa mga mag-uuma ilalom sa mas gipakusog nga “Rice Sufficiency Program”, ang Comval Province gihatagan sa Malacañang pinaagi sa DA sa “National Rice Achievers Awards” sulod na sa tulo ka higayon.

Labing ulahi ang “2016 National Rice Achievers Award”nga gidawat ni Gov. Tyron Uy pinaagi ni PAGRO Chief Dr. Rolando Simene ug mga kauban nga sila SP Members Macario Humol ug Majority Floor Leader Joseph Jaoud atol sa gihimong Awarding Ceremony didto sa Philippine International Convention Center sa Pasay City, Manila niadtong Mayo 23,2017.(Gilbert M. Cabahug, PAO-ID Comval)