P119.247 Milyones Hospital Income sa CVPH gigamit sa libreng pagpanambal sa kabus nga pasyente

Compostela Valley Province – Gilain gikan sa P386.308 Milyones Total Hospital Income sa Comval Provincial Hospitals sulod sa usa ka tuig nga pag-operate, ang P119.247 Milyones nga maoy gigamit sa probinsiya aron mahatagan sa libreng hospital services ang 21,393 ka mga pasyente nga wala na pabayra sa ilang hospital bills sa rason nga sila kabus ug lisud ang kahimtang sa ilang pamuyo.

Ang labing ulahing report sa opisina ni Provincial Economic Enterprise Management Office (PEEMO) Chief Dr. Ferdinand Anthony Soberano nagtug-an nga sa ikaduhang tuig nga pagdumala ni Gov. Jayvee Tyron Uy sa Comval Province adunay 21,393 ka mga pasyente ang natambalan nga libre kon way bayad sa upat ka mga hospital sa probinsiya nga mao ang CVPH Montevista, CVPH Laak, CVPH Pantukan, ug CVPH Maragusan.

Ang 4,681 kanila matud pa niya, natambalan nga libre ubos sa Charity Program ug ang laing 16,712 ka mga pasyente naserbisyohan gihapon sa way bayad nga pagpanambal sa probinsiya ubos sa No Balance Billing(NBB) Policy ni Pang. Rodrigo Roa Duterte (PRRD) nga hugtanong gipatuman sa opisina ni Gov. Tyron Uy ug SP Members sa pagpanguna nila ni Vice Gov. Manuel “Way Kurat” Zamora ug Senior Board Member Arturo “Chiongkee” Uy.

Iyang giklaro sad nga luyo sa libo-libo ka mga pasyenteng kabus nga naserbisyohan nga libre sa way bayad nga pagpanambal, ang upat ka mga Provincial Hospitals mitala sad sa dako kaayong Hospital Income nga miabot sa dul-an P400 Milyones sulod lang sa usa ka tuig ug gikan niini gilain ni Gov. Tyron Uy ang P119.247 Milyones nga maoy gigamit sa probinsiya aron mahatagan sa libreng Hospital Services ang 21,393 ka mga pasyente nga wala na pabayra sa ilang Hospital Bills sa rason nga sila kabus ug lisud ang kahimtang sa ilang pamuyo. (Gilbert M. Cabahug, IDS-Comval)