Gov. Tyron Uy suportado ang LGU Monkayo sa“Diwalwal Issue”

Compostela Valley Province–-Katungod sa Municipal Local Government Unit (MLGU) sa Monkayo nga supakon ang entry sa Large Scale Mining Company diha sa Diwalwal, ug matud  ni Gov. Jayvee Tyron Uy nga kini iyang girespeto ug gisuportahan kay sila gawasnon sa pagbuhat niini labi na nga sa ilang pagtuo makahatag kini og dakong kaayohan sa mga katawhan.

Sa pagsulti sa gobernador niini iyang giklaro nga siya hugot nga misuporta sa aksiyon  sa LGU Monkayo nga nagpagawas sa ilang manifesto nga hugtanong nagbabag sa Large Scale Mining Industry nga gipasulod sa Philippine Mining Development Corporation (PMDC) diha sa Diwalwal Mineral Reservation Area, ug matud pa niya nga sila adunay kagawasan nga mopagawas sa desisyon nga makahatag og dakong kaayohan sa lungsod kay kini ilang  katungod nga takos ug angayang respetuhon.

Niadtong Hunyo 8, 2018 nagpagawas sa ilang manipesto nga nagsupak sa entry sa dakong kompanya sa mina diha sa Brgy. Mt. Diwata ang MLGU Monkayo sa pagpanguna ni Mayor Gentugaya, diin apil sa mga mipirma ang 20 ka mga Brgy. Captains ug ang  napulo ka mga miyembro sa Sangguniang Panlalawigan sa lungsod.

Giklaro sa gobernador nga apil sa mandato sa MLGU Monkayo nga gihatag sa Local Government Code ang pagseguro nga ang ilang ginahimo makahatag ug dakong kaayohan sa mga katawhan, rason matud pa nga kon sa ilang hunahuna adunay negatibong epekto ang pagsulod sa PMDC Sponsored Mining Corporations diha sa Diwalwal katungod sad nila ang pagbalibad o pagsupak niini tungod sa kabalaka nga posibleng mawad-an sa panginabuhian ang mga katawhan.

Samtang sa iyang bahin giklaro sa Gobernador nga prayoridad niya sa pagkakaron ang rehabilitasyon sa Diwalwal tungod kinahanglanon kaayo nga maplastar in a proper order ang community sama sa pagplastar diha  sa Mabatas Area sa mga katawhan, sa mga Processing Plants, sa mga Ball Mills, lakip na ang pag-atiman sa nagkadaiyang panginahanglan sa gamayng mga minero.(Gilbert M. Cabahug, IDS-Comval)