SEMCO Agrarian Reform Beneficiaries Cooperative sa Monkayo naka-reloan og P200,000.00 sa MCAPC

Compostela Valley Province– Padayon gihapon karon ang probinsiya nga nagatabang sa mga koop ubos sa mas gipakusog nga Micro-Credit Assistance Program for Cooperatives (MCAPC) diin labing mahinungdanong component ang gipadak-ang benepisyo sa way interest nga pahulam sa dul-an 90 nga ka mga koop, ug apil sa mga nakabenepisyo niini ang SEMCO Agrarian Reform Beneficiaries Cooperative sa Monkayo nga gihatagan ni Gov. Jayvee Tyron Uy sa Reloan nga P200,000.00 aron ilang gamiton para sa ilang Banana Production.

Ang ilang P200,000.00 tseke malipayong gidawat sa ilang Board of Directors sa pagpanguna ni CEMCO BOD Chair Mr. Dominador Monteclaro ug Manager nga si Mr. Nicanor Ortiz gikan kang Gov. Tyron Uy pinaagi nila Assistant PAGRO Chief Ronald Sibayan, Assistant Provincial Administrator Fernando Juab, ug BM Vivencia Secuya nga maoy nagtunol niini niadtong Hunyo 4, 2018 atol sa Regular Employees Convocation Program.

Si  Provincial Cooperative Development  Division Chief Manny Buladaco nagsulti nga ilalom sa “Micro Credit Assistance Program for Cooperatives (MCAPC)” nga gipakusog sa Comval ni Gov. Jayvee Tyron Uy ug SP Members sa pagpanguna nila ni Vice Gov. Manuel “Way Kurat” Zamora ug Senior Board Member Arturo “Chiongkee” Uy gipatas-an na karon ang mahatag nga benepisyo sa walay interest nga pahulam sa mga kooperatiba diha sa onse ka mga lungsod sa Comval nga diin P150,000.00 na ang ihatag sa probinsiya sa mga koop alang sa 1st Loan gikan P100,000.00 lang sa milabayng mga katuigan.

Gisulti sad niya nga para sa 2nd Loan naa na karon sa P200,000.00 ang madawat sa mga koop sa walay interest nga pahulam ug P250,000.00 ang ihatag sa probinsiya para sa ilang 3rd Loan nga wala gihapoy interest. (Gilbert M. Cabahug, PAO ID-Comval)