23 ka mga Secondary Schools sa Comval duna nay “Adolescent Friendly Health Facilities”

Compostela Valley Province— 23 na ka pambulikong mga Eskwelahan sa Sekondarya sa  tibuok Comval Province ang duna nay “Adolescent Friendly Health Facilities” nga maoy unang hunat sa full implementation ni Gov.Jayvee Tyron Uy sa “Responsible Parenthood and Reproductive Health Act of 2012 (RA 10354)” nga iyang gipatuman sa tibuok Comval pinaagi sa mas gipakusog niyang “Adolescent Health and Development Program”.

Ang 23 ka mga “Adolescent Friendly Health Facilities” nga sagad ginatawag nga “Teen Tambayan” magsugod pag-operate sa School Year 2018-2019, ug gisulti sad ni Adolescent Health and Development Program Coordinator Mary Grace Raymundo sa PHO nga tungod sa  padayong pagtinabangay sa probinsiya ug DepEd malaumon karon ang gobernador nga sa sunod tuig makompleto na pagbutang niini ang tanang mga tulunghaan sa Sekondarya sa onse ka mga lungsod.

Ang maong pasilidad maoy adtoan sa mga High School Students nga nagkinahanglan ug tambag maoy labot sa mga problema sa sayong sexual relations aron malikayan ang Teenage Pregancy kon sayong pagmabdos ug pagsabak sa ingon mapaneguro nga sila makahuman sa ilang pagtuon nga maghatag kanila og maayong kaugmaon.

Parte sa preparasyon ang pagtudlo sa tulo ka mga Peer Facilitators matag Eskwelahan nga sagad kanila mga Student Leaders nga mamahimong katabang sa ilang tagsa-tagsa ka mga Guidance Counselor sa promotion sa adbokasiya may labot sa Adolescent Sexuality and Reproductive Health.

Una niini ang usa ka adlawng “Orientation on Responsible Parenthood and Reproductive Health Act of 2012 (RA 10354) and the Standard Tools on the Establishment of Adolescent Friendly Health Facilities” diha sa kapitolyo niadtong Marso 20,2018 nga giapilan sa kapin kon kulang 100 ka mga High School Teachers nga natudlong Reponsible Parenthood and Reproductive Health Coordinators (RPRH) sa pribado ug pampublikong mga tulunghaan sa sekondarya sa onse ka mga lungsod sa Compostela Valley. (Gilbert M. Cabahug,PAO-ID Comval)