Sa Comval: 68 ka tawo nanulod sa langob

Compostela Valley Province-Gikan sa 148 ka mga partisipante sa bag-o nahumang “7th Tapok Tunob sa Langob” ang 68 ka mga tawo nga nanulod sa 652 Metros nga Mahayahay Cave diha sa Brgy. Tuboran Mawab nga giilang pinakalalom nga langob saComval Province base sa pinakaulahing survey sa Davao Spellological Conservation Society (DSpeCS).

Parte sa Programa sa Turismongagipakusog sa Comval ni Gov.Jayvee Tyron Uy ug SP members sa pagpanguna nila ni Vice Gov. Manuel “Way Kurat” Zamora ug Senior Board Member Arturo “Chiongkee” Uy ang pagpreserbar sa mga langob ug pagpanindot niini sa ingon mamahimo kining laaganan tungod sa mga madanihong hiyas nga gustong makita sa mga turista ug mga katawhan nga hilig ang pagsuroy sa nagkadaiyang lugar sa kalibutan.

Sa pagkakaron ang Mahayahay Cave maoy pinakalalom sa mga langob sa Comval nga gideklarang Safety para sa Spelunking Activities aron mapasundayag ang mga bahandi ug talagsaong hiyas niini nga makonsiderang tourism potential labi na nga naa kini mahimutang sa Camp Manuel T. Yan Sr. Eco Military Park and Tribal Village sulod sa 100 ektaryang Kampo sa 10th ID Philippine Army.

Sulod sa Mahayahay Cave ang limpiyong tubig nga nagdagayday ug nagpuyo niini ang lain-laing klase sa ihalas nga mga mananap sama sa mga kabyaw, langgam nga sayaw, halo, ibid, lain-laing klase sa mga halas, ug uban pa.

Niadtong Mayo 15-17,2018 ang “7th Tapok Tunob sa Langob” mitala og 148 ka mga partisipante apil na ang 68 ka mga individual nga nanulod sa Mahayahay Cave ubos sa maayong paggiya sa probinsiya pinaagi sa Compostela Valley Caves Conservation Society, sa 10th ID Philippine Army, ug sa Provincial Tourism Office ilalom sa Opisina ni Gov. Tyron Uy.

Unang adlaw sa kalihokan ang orientation sa mga cavers bahin sa “Cave Resources Management Act ilalom sa RA 9072, sa Philiipine Tourism: Evolution Toward Sustainability nga gihatag ni Senior Tourism Officer Christine Dompor, sa Cave Ethics nga  sagad mohatag og lecture si Provincial Caving Coordinator Prescilla Decena, ug uban pa.(Gilbert M.Cabahug, PAO-ID Comval)