154 CVSP Scholars gipirmahan ang CVSP Contract

Compostela Valley Province – Opisyal na nga gipirmahan ni Gov. Jayvee Tyron Uy ug sa 154 CVSP Scholars ug ilang mga ginikanan ang Compostela Valley Scholarship Program (CVSP) Contract aron mapaniguro ang maayong kaugmaon sa bag-ong Batch sa mga Scholars nga tabangan sa probinsiya nga makahuman sa ilang pagtuon ilalom sa gibag-ong CVSP.

Kini sila maoy mipasar sa 2,196 ka mga estudyanteng Comvaleño nga mipailalom sa nagsunod-sunod nga CVSP Written Exam sa milabayng 2017 ug sa CVSP Oral Exam (Panel Interview) niadtong Pebrero 2018.

Nahitabo ang CVSP Orientation and Contract Sigining diha sa Social Hall sa kapitolyo niadtong Mayo 30, 2018 nga gisugdan sa Welcome Message ni PSWDO Chief Josephine Frasco diin parte sa kalihokan ang Team Building Activity, ang Focal Group Discussion, ang pagpaminaw sa Inspiring Message ni Gov. Tyron Uy, ug ang  Commitment Setting sa mga ginikanan nga maoy nag himong emotional sa usaka adlawng panagtapok sa bag-ong Batch sa mga Scholars nga tabangan gihapon sa gobyerno nga makahuman sa ilang pag-eskwela.

Matud  ni  CVSP Provincial Coordinator Clarion nga sama sa milabayng School Year miabot gihapon sa P17 Milyones ang pundo nga gigahin ni Gov. Tyron Uy para sa SY 2018-2019 CVSP nga giparobahan bag-o lang sa Comval SP sa pagpanguna nila ni Vice Gov. Manuel “Way Kurat” Zamoraug Senior Board Member Arturo “Chiongkee” Uy.

Ilalom sa mas gipalapdang CVSP, kadtong moeskwela sa Baccalaureate kon lima ka tuig pataas sa kolehiyo ug sa TVET hatagan sa probinsiya og P15,000.00 matag semester gikan P10,000.00 lang matag semester sa milabayng tuig.

Samtang P25,000.00 matag Semester ug allowance nga P10,000.00 matag semester sad ang benepisyo nga ihatag sa probinsiya ngadto sa mga estudyanteng moeskwela sa Prioritized Baccalaureate Courses  sama sa Engineering Courses; sa BS Education in Physics ug BS Education in Chemistry; sa Social Sciences Courses sama sa BS Psychology ug BS Social Work; sa Natural Sciences Courses sama sa BS Environmental Science; ug Medical Courses nga naglakip sa BS Nursing, BS Clinical Laboratory, Radiologic Technology, ug BS Midwifery.

Apil sad niini ang  moeskwela sa Highly Specialized /Prioritized  Medical Courses (Doctor of Medicine) nga pagahatagan sa probinsiya og P30,000.00 allowance matag semester para sa ilang Miscellaneous Expense. (Gilbert M. Cabahug, ID Comval)