800,000 Cacao Seedlings sa DA gipanghatag sa Comval Farmers

Compostela Valley Province—–Padayon gihapon karon si Gov. Jayvee Tyron Uy  nga nanghatag sa libreng mga semilya sa Cacao, ug apil sa iyang mga gipanghatag ang laing 800,000 ka punoang semilya sa Cacao nga gihatag gihapon sa Comval ni Pangulong Rody Duterte pinaagi sa Department of Agriculture (DA) alang sa tuig 2017.

Dugang sa iyang mga gipanghatag ang 102,000 ka punoang Rubber Seedlings, ang 84,000 ka punoang semilya sa kape nga Robusta, ug ang 5,850 ka sakong abuno nga iyang gipanghatag ngadto sa Cacao ug Coffee Farmers nga ang edad sa una nilang mga tanom naa na sa 10 ka tuig pataas.

Parte sa gipakusog nga “Rebuilding and Recovery” nga hugtanong gipatuman sa Comval ni Gov. Tyron Uy ug  SP Members sa pagpanguna nila ni Vice Gov. Manuel “Way Kurat” Zamora ug Senior Board Member Arturo “Chiongkee” Uy ang pagpanghatag sa libreng mga semilya sa High Value Commercial Crops (HVCC) labi na sa Cacao nga dunay dakong potensiyal sa gitinguhang Inclusive Growth para sa mga katawhang Comvaleño.

Padayong nagataas ang demand sa Cacao, ug giklaro sad sa mga dagkong opisyal sa DA nga ang taas kaayong demand sa Cacao ug ang nasinatian nga padayong pagnihit kon kakulangon sa supply niini miresulta sa padayong pagsaka sa presyo diha sa merkado.

Timaan kini matud pa nga duna gyo’y maayong kaugmaon kadtong mga mangunguma nga dunay daghang tanom nga Cacao  ug kadtong gustong magtanom pa niini diha sa ilang umahan tungod sa dako ug padayong nagatubo nga panginahanglan diha sa merkado nga maoy timaan sa stability sa taas nga presyo sa Cacao base sa Value Chain Analysis (VCA)  nga gihimo sa DA ug sa uban pang mga sangang buhatan sa nasyonal nga gobyerno. (Gilbert M. Cabahug, IDS-Comval)

BETA: Testing Phase