Galing Mason Training sa 40 RVS og FRs sa Brgy. Pasian gisugdan

Compostela Valley Province—Opisyal na nga gisugdan sa 40 ka mga Reformed Voluntary Surrenderers (RVS) ug Former Rebels (FRs) ang 20 ka adlawng “Gawad Kalinga Build CUM Holcim Galing Mason Training” diha sa Brgy.Pasian sa lungsod sa  Monkayo, ug mismo si Gov. Jayvee Tyron Uy maoy nanguna sa Opening Program niini nga nahitabo niadtong Oktobre 11,2017.

Kini sila ang 1st Batch sa 80 ka mga RVS ug FRs nga nakabenepisyo sa After Care Program ug Comprehensive Local Integration Program (CLIP) nga gipakusog sa Comval ni Gov. Tyron Uy ug SP Members sa pagpanguna nila ni Vice Gov. Manuel “Way Kurat” Zamora ug Senior Board Member Arturo “Chiongkee” Uy.

Tumong  sa gipakusog nga After Care Program sa Comval ang padayong pag-atiman sa mga RVS nga na ulian na gikan sa pagkagumon sa ginadiling druga human ang kapin duha ka bulang “Community Based Rehabilitation Sessions” ubos sa “Oplan Liwanag” ug sa mga FRs nga naninguha nang magpuyong malinawon kauban sa ilang tagsa-tagsa ka pamilya diin parte niini ang pagpalambo sa ilang katakos sa panginabuhi pinaagi sa 20 ka adlawng “Galing Mason Training” nga libreng gitunol kanila sa PLGU Comval ug sa Holcim Philippines nga maoy Constant partner sa probinsiya niining programaha.

Ang 20 ka adlawng mga pagbansay sa Masonry diha nila himoa sa “New Berjaya GK Village” sa sulod sa compound sa Comval Farm sa Brgy. Pasian nga una nang gitukoran og 14 ka mga GK Housing Units atol sa malampusong “Bayani Challenge 2017” nga nahitabo sa ikaduhang semana sa Hunyo 2017.

Hands on sa ilang training ang laing 16 ka mga Housing Units nga ipabarog diha gihapon sa  yuta nga gipanag-iya sa PLGU Comval. Samtang dakong bahin sa gigamit nga materyales ang gikan sa Gawad Kalinga Foundation ug sa Holcim Philippines nga mihatag sa probinsiya sa 400 ka sakong semento.

Dugang sa kapin kon kulang 400 ka sakong mga semento ang Holcim Philippines nagpadala sa mga ekspertong magtutudlo, naghatag sa mga Personal Protective Equipments, sa P100.00 nga allowance kada adlaw sa matag partisipante, ug sa nagkadaiyang Masonry Equipments and Tools nga maoy gigamit sa mga partisipante panahon sa libreng training  nga gidumala sa probinsiya, sa Holcim Philippines, ug sa TESDA.

Samtang ang probinsiya maoy naghatag kanila sa libreng mga pagkaon kada adlaw nga naglakip sa ilang pamahaw, paniudto, panihapon ug snacks sulod sa 20 ka adlawng training sa masonry diha sa Brgy. Pasian. (Gilbert M. Cabahug, IDS-Comval)