Sa Comval: “P381M Infrastructure and Road Upgrading Projects” sa DOT human na

Compostela Valley Province--Human na ang laing unom ka mga  Road Upgrading Projects sa Comval nga nagkantidad og P381 Million pesos nga gibubo sa Malacañang pinaagi sa  sa Department of Tourism (DOT) ug sa Department of Public Works and Highways (DPWH) ubos sa “Tourism Road Infrastructure Development Program”.

Matud ni Engr. Edwin Ortiz sa DPWH iyang gipahibalo sad nga sa Enero 2018 na pagasugdan ang 15 ka mga Road Concreting Projects  sa Comval gihapon nga naaprobahan bag-o lang sa Tourism Infrastructure Enterprise Zone Authority (TIEZA).

Dugang ni Ortiz nga ang mga Tourism Road Infrastructure Projects usa ka  Priority projects nga gibubo sa Comval ni Pang. Rodrigo Duterte pinaagi sa DOT ug sa DPWH ilalom sa Tourism Road Infrastructure Priority Program Convergence (TRIPPC).

Nahitabo kini atol sa usa ka adlawng “Comval Tourism Month Awarding and Culmination Day” sulod sa Big 8 Hotel sa Tagum City niadtong Sept.29,2017 nga gidumala ni Tourism Committee Chair Board Member Joanna Aileen Gentugaya ug  sa opisina ni Provincial Tourism Council Chair Gov. Jayvee Tyron Uy.

Apil matud pa sa mga proyektong nahuman ang P30 Milyones nga Road Upgrading sa “New Albay-Marangig Road” sa Maragusan sa gilay-ong 2 ka kilometro; ang P90 Milyones Road Upgrading sa “Andap-Liboton-White Peak Road” sa New Bataan nga dunay 3 ka kilometrong gilay-on; ug ang P40 Milyones nga Road Concreting sa “Nabunturan Public Market and Terminal” nga dunay 2 ka kilometrong gilay-on.

Apil sad niini ang P40 Milyones nga Mabini Circumferential Road paingon sa Beach Centers sa lungsod sa Mabini nga dunay 2 ka kilometrong gilay-on, P80 Milyones nga Road Upgrading sa Tadya Falls, New Bataan nga gidugangan sad ug laing P51 Milyones nga maoy mikompleto sa kapin 4 ka kilometrong gilay-on sa gisementong proyekto, ug laing ang hapit duha ka kilometrong “Coronobe-Tagbibinta Road” sa Maragusan nga mopaingon sa Tagbibinta Waterfalls ug Mt. Candalaga Peak nga nahuman sa kinatibuk-ang kantidad nga P50 milyones. (Gilbert Cabahug,IDS-Comval)