Gov. Uy gitugot ang paggamit sa “Type C Uniform” para sa 11th BSP Comval Council Jamboree

Compostela Valley Province—  Para sa nagsingabot nga  11th BSP Comval Council Jamboree and Kab-O-Rama nga sa unang higayon pagahimoon sulod sa Comval Capitol Compound sa Septyembre 27-Oktobre 1,2017, gitugot karon sa BSP Comval Council   ang pagpaapil sa mga kabataan nga mogamit lamang og Type C Uniform kay gusto ni BSP Comval Council Chair Gov. Jayvee Tyron Uy nga daghan ang makaapil niini tungod dili dako ang magasto.

Gisulti ni School Governance Operation Division Chief Dr. Ruben Reponte sa Comval DepEd ang hapit P2,000.00 nga magasto sa “Type A Uniform” ug maglisud pagpalit niini ang kasagaran sa mga estudyante mao nga gimando karon ni BSP Comval Council Chair Gov. Tyron Uy nga tugotan pagpaapil kadtong mga kabataan  nga mogamit sa Type C Uniform nga mao lang ang pagsul-ob sa ilang School Uniform nga Short Pant, puti nga T-Shirt, ug BSP Nickerchief.

Parte matud pa sa gihimong pagpangandam sa nagsingabot nga pagsalmot sa probinsiya sa ASEAN Scout Jamboree  sa Tagum City sa moabot nga Nobyembre 27-Desyembre 2,2017 ang 11th  BSP Comval Council Jamboree, ug gawas sa preparasyon gusto sad sa batan-ong Uy nga diha kini sa kapitolyo pagahimoon aron nga sa himoong pag-develop sa Comval Capitol Compound Phase-II ang mga kabataan maoy unang makagamit ug makapahimulos.

Segun sa nakalatag nga Program of Activities ang mga partisipante ipaailalom sa lima ka adlawng mga pagbansay sa nagkadaiyang mga survival skills nga mas palamboon  pinaagi sa himoong indigay panahon sa pagasaw-ang Skill-O-Rama nga maglakip sa Three Legged Race, Skinning the Snake, ang “Ring and Straw Relay”, Flag Pole Raising, Compass Relay, Message Relay, Chariot Race, Wig-wag, Fire Building, Undressing-Dressing Contest, Egg-Spoon Relay, Knot Tying Contest, ug Marble Race.

Sama sa milabayng Jamboree naa gihapon ang Fancy Drill Competition; ang Physical Fitness; Sub-Camp Campfire; Woodbadge Reunion; Grand Campfire Kid and Kawan Holiday; Dawn Peace Walk; ug nagkadaiyang Amazing Activivties sama sa Challenge Valley, Back to Basic, Emergency Preparedness, ug Cultural Exchange. (Gilbert Cabahug/ids comval)