the Official Website of Compostela Valley

Sa Comval: 209 Persons with Deprived Liberty (PDL) natabangan nga mahimong gawasnon sa EJOW

Compostela Valley Province–-Mokabat sa 209 ka mga Persons with Deprived Liberty (PDL) gikan sa nagkadaiyang mga lungsod sa Comval Province ang natabangan sa gobyerno nga mamahimong gawasnon pinaagi sa Enhanced Justice on Wheels (EJOW) nga sa unang higayon misulod sa probinsiya.

Sa milabayng Hunyo 27, 2019 misulod sa Comval Province ang EJOW diin human sa Open Forum gipahibalo mismo ni Supreme Court of the Philippines Administrator Jose Midas Marques ang mokabat 209 ka mga PDL nga gideklarang gawasnon human ang nagsunod-sunod nga mga Court Hearings nga gihimo sa mga Judges sa Region XI sulod sa Custom Buses nga maoy gihimong Trial Courts.

Sumala ni Marques nga niadtong adlawa adunay 518 Cases Heard, 217 Decisions Promulgated, 209 Detainees Released, 21 Cases Dismissed, 2 Referred to Mediation served diin  usa ang successfully mediated ug back to court ang laing usa.

Samtang, sa gihimo nilang Jail Visitation adunay 335 PDLs nahatagan sa mga serbisyo nga libreng medical, 180 sa libreng dental, ug 50 natabangan sa libreng legal services. Aduna say 250 ka mga Brgy. Officials nga gipailalom sa usa ka adlawng “Mediation and Conciliation Training” nga gipasiugdahan mismo  sa mga dagkong opisyal sa Philippine Judicial Academy (PHilJA).

Ang EJOW usa sa mga labing importanteng proyekto sa Supreme Court of the Philippines nga gituyo pagmugna aron mapaduol sa kabus nga mga katawhang Pilipino ang hustisya pinaagi sa paghatag og “On the spot free and fast dispute resolution services”.

Pinaagi EJOW Comval nagpartner ang 5 Pillars of Justice ug ang PLGU Comval sa pagpanguna ni Gov. Jayvee Tyron Uy aron mapaneguro ang paspas nga paghatud sa hustisya sa mga katawhan labi na sa mga PDL pinaagi sa mobile court hearings, mobile court-annexed mediation, libreng serbisyo sa mga abogado, ang paghatag ug kasayuran sa katungod sa mga marginalized sector, ug uban pa.

Gibase ang EJOW matud ni RTC Branch 3 Executive Judge Cresenciana D.C. Cruz panahon sa iyang paghatag og rationale, sa “Guatemalan Mobile Court System” diin sa 2004 gitawag kining proyektoha sa Philipinas nga Justice on Wheels nga karon nahimo nang EJOW tungod sa paghimo niini nga mas gipakusog ug mas gipalapad nga proyekto sa Supreme Court. (Gilbert M. Cabahug, PAO-ID Comval)

Please like and share:
Social media & sharing icons powered by UltimatelySocial