the Official Website of Compostela Valley

Comval Zero Case gihapon sa sakit nga Malaria

Davao De Oro Province––Malaumon karon si Gov. Jayvee Tyron nga mag “Zero Case” gihapon karon sa sakit nga Malaria ang tibuok Comval Province, ug gihulat na lang ang official declaration sa DOH nga Zero Case sulod sa lima ka nagsunod-sunod nga mga katuigan ang nahibiling upat ka mga lungsod aron official sad nga ideklara niini ang tibuok probinsiya nga “Zero Case” niining sakita nga walay bugto sulod sa lima ka tuig.

Sa milabayng tuig 2016 Official nga gieklara sa DOH nga Malaria Disease Free Zones  ang mga lungsod sa Maragusan, New Bataan, Mabini, Nabunturan, Pantukan, Compostela, ug Mawab tungod “Zero Case” sa sakit nga Malaria nga walay bugto sulod sa lima na ka mga katuigan.

Apil sa mga labing gikahadlokang sakit sa kalibutan ang Malaria Disease   tungod  mahimong mamatay ang pasyente kon dili matabang. Hinungdan niini ang blood parasites nga Plasmodium falcifarum, Plasmodium vivax, Plasmodium ovale, Plasmodium malariae, ug pinakabag-o ang Plasmodium knowlesi.

Ang Malaria Program Coordinator (MPC) sa Comval nga si Abegail Antonio usa ka Comval Medtech nagtug-an, nga pipila sa mga sintomas niining sakita mao ang taas  nga kalintura, pagpanugnaw, pagpangurog, grabeng singot, ug sama sa mga bation kon adunay Flu ang pasyente.

Kining sakita motakboy sa tawo human mapaakan sa babayeng Anopheles Mosquito nga maoy sagad nagdala sa nahisgutang mga parasito. Ang mga parasito mosulod sa panit pinaagi sa gihimong pagpaak sa lamok ug madala sa dugo ngadto sa atay diin didto ang mga parasito motubo ug modaghan. Panahon sa incubation period dili pa kini mamamatikdan tungod ang mga sintomas  mogawas sa pinakadali mga walo ka adlaw.

Gisulti sad niya nga dako’g natabang sa  nakab-ot nga zero case sa sakit nga Malaria sa tibuok probinsiya ang gihimong distribution matag tuig diha sa Malaria Endemic Barangays sa Long Lasting Insecticide Treated Nets (LLIN) nga gitunol sa Global Fund Malaria pinaagi sa Pilipinas Shell Foundation Inc.

Ang pagpanghatag niini padayong gihimo sa mga Staff sa Provincial Health Office (PHO) sa pagpanguna ni PHO Chief Dr. Antonio P. Ybiernas Jr. ilalom sa “Malaria Prevention and Control Program” nga gipakusog sa Comval ni Gov. Tyron Uy ug SP Members sa pagpanguna nila ni Vice Gov. Manuel “Way Kurat” Zamora ug Senior Board Member Arturo “Chiongkee” Uy.(G. Cabahug, IDS Comval)

Please like and share:
Social media & sharing icons powered by UltimatelySocial